Fleire blei vekte av eit jordskjelv tidleg måndag morgon. Iselin Nærbø (21) synest det var ei skremande oppleving.

– Eg vakna av ein kraftig lyd. Det høyrtest ut som nokon sprengte noko rett utanfor vindauget mitt. Så ser eg ut og kjenner at det ristar i bakken, og då skjønte eg at det var eit jordskjelv.

Nærbø er frå Bergen, men bur på Voss.

– Eg var redd, for eg har aldri opplevd jordskjelv før. Eg har aldri vakna på den måten. Bråvakna til ein så høg lyd før. Eg fekk litt panikk.

– Varte overraskande lenge

Trygve Lyshagen Tømmerås vakna også av jordskjelvet.

– Plutseleg vakna eg av at det rista veldig. Eg synest det rista veldig lenge, så eg skjønte ikkje heilt med ein gong kva det var, seier Tømmerås, som bur på Voss.

Ifølgje Det europeiske jordskjelvsenteret (EMSC) fann skjelvet stad klokka 04.21 og hadde ein styrke på 3,3. Dei melde fyrst at det hadde ein styrke på 3,1.

Skjelvet skjedde ved Mjølfjell, aust i Voss herad.

Tidlegare jordskjelv i same område og om lag same styrke, var i mars 2012, melder forskingsstiftinga Norsar.

Fordi Tømmerås har budd i Mellom-Amerika før og opplevd jordskjelv der, var han ikkje lenge i tvil om kva det var han hadde vakna av.

– Men eg vart overraska over kor lenge det varte. Det varte lenger enn det har gjort før, seier han til NRK.

– Sånt ein verkeleg vaknar av

Tømmerås anslår at skjelvet varte omtrent eitt minutt.

– Det er nok til at du vaknar og kjenner det, seier han.

Han beskriv skjelvet som ei mørk, jamn during. Og sjølv om han tidlegare har opplevd fleire jordskjelv i Mellom-Amerika, har han ikkje opplevd det like sterkt i Noreg.

– Eg reknar med at resten av bygda må ha merka det òg. Det er sånt ein verkeleg vaknar av, beskriv han.

Skjelvet kunne merkast over store deler av Vestlandet, og NRK har snakka med fleire som opplevde det.

– Eg vakna av at senga rista, og at glasa klirra i skapet nede i stova. Eg synest det var ekkelt, seier Tove Nødseth, som bur i Sogndal.

– Midt på treet

Berit Marie Storheim er senioringeniør ved institutt for geovitenskap på Universitetet i Bergen.

Ho slår fast at skjelvet i natt neppe har ført til skadar. Ho oppmodar dei som merka det til å melde det inn på skjelv.no.

– I verdssamanheng er dette eit lite skjelv. I norsk samanheng er det sånn midt på treet, seier Storheim.

Skjelvet blei først rapport inn frå ein person i Vaksdal, ifølgje Storheim. Men det hadde episenter aust i Voss herad.

– Dette er eit område om har skjelv frå tid til anna, seier ho.

Fleire utsette område

Fleire område i Noreg er ekstra utsette for jordskjelv, deriblant kysten utanfor Vestlandet.

I tillegg er Nordland og området rundt Oslofjorden ekstra utsett.

Les ogsåFire etterskjelv registrert i Nordsjøen – disse stedene er ekstra utsatt for jordskjelv

Kvifor det er så mykje jordskjelvaktivitet akkurat i desse områda, har forskarane prøvd å finna ut av. Truleg har det å gjere med svake soner i jordskorpa i enkelte område.

Sjølv om det ikkje er heilt uvanleg med jordskjelv i Noreg, er dei fleste så svake at dei ikkje er til fare for nokon.

Eit jordskjelv utanfor Helgelandskysten i Nordland i 1819 er truleg noregshistorias største. I etterkant vart det målt til 5,8 i styrke.

Kilde: Nrk